Nub tim 5-7/02/2010
 Lub neej tshab huv tus Tswv Yexus yog le caag? Ntau zaug peb xaav has tas, yog le caag, lu lug kws has tas, “ Lub neej tshab” txhas tau has tas, yeej muaj lub neej qub hab, yog le hov ua caag ho lug muaj lub neej tshab, twb yog lub neej qub tsis zoo txaus, peb txhaj le lug nrhav tau lub neej tshab lawm. Thaum kws peb lug tau lub neej tshab lawm peb yuav tau ua le caag.
Ua lub neej kuas tswm nyog qhov kws peb yog neeg tshab.
Vaajtswv txujlug ntawm Loos 12:1 “Cov kwv tij, Vaajtswv hlub peb kawg nkaus le, yog le hov kuv txhaj ntuas mej has tas, thaum mej tseem ua neej nyob nuav, mej yuav tsum muab mej lub cev fij rua Vaajtswv kuas dawb huv hab haum Vaajtswv sab. Yog mej ua le hov, txhaj yog mej pehawm Vaajtswv raws le Vaajtswv sab nyam.”
 Yog le hov peb yuav muab daabtsw pub rua Vaajtswv, yaam kws caj sa twb yog peb lub neej ntaag, peb yuav tsum ua peb lub neej yog lub neej tshab huv tus Tswv Yexus. Thaum peb lug txais yuav tus Tswv Yexus lawm peb yuav tsum muaj lub neej tshab kuas phim qhov kws peb lug ntseeg tus Tswv Yexus. Thaum peb tseem ua daab tauj daab qhev peb ua lub neej qub. Tabsws nwgnuav peb lug ua lub neej tshab lug muaj tus Tswv Yexus, peb yuav tsum ua lub neej kuas tswm nyog qhov kws nws lug tuag theej peb lub txhoj.
Tus Tswv Yexus txuj kev tuag saum ntoo ntaj npab yog lug ris peb lub txim peb yuav tsum tau ua txhua yaam kuas zoo txhaj phim qhov kws nws lug tuag hab raug kev txomnyem, thaum nws raug kev txomnyem le hov twb yog vim peb lub txim ntag. Yog le hov peb txhaj yuav tau ua lub neej tshab huv tus Tswv Yexus.
 “ Xyoo nuav muaj cov ntseeg tuaj koom lub rooj sablaj kwvlaam le 190 leej ua Vaajtswv tsaug kws Vaajtswv pub peb suavdawg tau tuaj sws ntswb hab tau kawm Vaajtswv txuj lug ua ke vaam has tas peb yuav cuj yaam kws kawm moog swv huv peb lub neej thov Vaajtswv foom koob moov rua suavdawg sws ntswb dua lwm xyoo..” |
